បន្ទាយមានជ័យ៖ របាយការណ៍ពីរដ្ឋបាលខេត្តបន្ទាយជ័យឱ្យដឹងថាក្នុងឆ្នាំ២០២១នេះ អាជ្ញាធរនៃប្រទេសថៃបានចាប់បញ្ជូនពលករខ្មែរដែលរស់នៅ និងធ្វើការនៅប្រទេសថៃមកវិញតាមច្រកព្រំដែននៃខេត្តបន្ទាយមានជ័យមានចំនួន ៨០ ៦៩២នាក់ ក្នុងនោះមានស្រី ៣១ ៩៤៧នាក់ និងកុមារ ៨ ៧៨៨នាក់។

របាយការណ៍នេះគឺធ្វើការស្រង់ពីថ្ងៃទី១៦ ខែធ្នូ ឆ្នាំ២០២០ ដល់ថ្ងៃទី១៥ ខែធ្នូ ឆ្នាំ២០២១ ដែលបង្ហាញពីមណ្ឌលសំចតសរុបចំនួន៥ក្នុងខេត្តដែលត្រូវទទួលពលករ ពលការិនីកម្ពុជា។ ក្នុងនោះមណ្ឌលសំចតប៉ោយប៉ែតទទួលបានពលករចំនួនជាង៥ម៉ឺន៧ពាន់នាក់ ច្រកអូរបីជាន់ទទួលពលករបានជាង៦ម៉ឺន២ពាន់នាក់ ច្រកម៉ាឡៃទទួលបានជាង៧ពាន់៥រយនាក់ ច្រកបឹងត្រកួននិងអូស្មាច់ទទួលបានពលករបានជាង៤ពាន់៦រយនាក់។

របាយការណ៍នេះត្រូវបានផ្សព្វផ្សាយក្នុងកិច្ចប្រជុំសម្របសម្រួលស្តីពី ចំណាកស្រុកប្រកបដោយសុវត្ថិភាព និងទប់ស្កាត់អំពើជួញដូរមនុស្ស (ស្រ្តីនិងកុមារ) ដោយពង្រឹងភាពជាដៃគូរវាងអាជ្ញាធរមូលដ្ឋាន និងបណ្តាញអង្គការមិនមែនរដ្ឋាភិបាលក្នុងកិច្ចការពារកុមារ ដែលធ្វើឡើងនៅសាលប្រជុំ សាលាក្រុងប៉ោយប៉ែត នៅថ្ងៃទី២៣ ខែធ្នូ ឆ្នាំ២០២១។

អភិបាលរងខេត្តបន្ទាយមានជ័យលោកស្រី រស់ សុផានី បានថ្លែងក្នុងកិច្ចប្រជុំនេះដោយបានជំរុញដល់ភាគីពាក់ព័ន្ធក្នុងខេត្តទាំងអស់ចូលរួមជួយផ្ដល់ព័ត៌មាន និងសេវានានាដល់ក្រុមគ្រួសារជនចំណាកស្រុក ជាពិសេសពលករចំណាកស្រុកទៅប្រទេសថៃបន្ថែមទៀត ដើម្បីជំរុញសកម្មភាពនៃការចំណាកស្រុកប្រកបដោយសុវត្ថិភាពនិងទប់ស្កាត់ការជួញដូរមនុស្ស។